کتابخانه عمومی پانزده خرداد خوی

قیز دئییر : اونلار سنه دئیینده گل بو یولا نردبان سالاق . دئمك ایسته ییرمیش كه گل یولی صحبت ائده – ائده گئدك . سن اونون سوزونی باشا دوشمه ییبسن . قیز نه قدر ائله ییر آتاسی اونلاری ائوینه چاغیرماق ایسته میر . اودور كه قیز دئیر : – آتا غریب آدامدیلار . هیچ اولماسا بیر آز خورك حاضرلاییم آپار وئر یئسینلر. قیز بیر تهر آتاسینی راضی سالیر . بیر بوشقاب دولما . بوتوو تندیر چورگی . بیر قاب دا سود وئریر كه ، آپار وئر . قوناقلارا منیم آدیمدان دئیه رسن كه . قیزیم دئییر آی بوتوودیر. اولدوزلار چوخدور . سایا بیلمدیم . دریادا آغزیناجان دولودور . سونرا انولار نه دئسه لر گلیب منه دئیه رسن . كیشی خورگی آپاراندا یولدا آچیب دولما ایله چورگین یاری سینی یه ییر . سودی ده تمام ایچیر . قاب بوش قالیر . سونرا خورگین قالانینی آپاریب درویشلره وئریر . درویش گورور كه بشقابین ایچینده اون – اون بش دولما وار . پارا چورك ، بیر ده بیر بوش قاب . درویشلر دولما ایله چورگی یه ییرلر قابلاری كیشییه قایتاراندا ، درویش دئییر : گئت قیزینا دی كه ، آی پارا ایدی ،اولدوز دار چوخ دكیلدی ، اون – اون بش اولاردی ، دریادا تمام قوروموشدی . كیشی گلیب همین سوزلری قیزینا دئین كیمی قیز دئدی : آتا ، عیب دكیلمی سن نیه قوناغا آپاردیقین خوركی یه ییبسن ، سودی ده ایچیبسن . كیشی دئییر : قیزیم دولمانی یولدا یه دیكیمی سن هاردان بیلدین ؟ قیز دئییر : بونی درویشلر سنین دیلین له منه خبر وئردیلر . من سنه دئیه نده كه ، آی بوتوودیر ، اولدوزلار چوخدور ، دریا دولودور ، دئمك ایسته ییردیم كه ، چورك بوتودور ، دولمالار چوخدور ، سود ده قابلا بیردی . درویشلر منه خبر گوندردیلر كه ، آی پارادیر ، اولدوزلار چوخ دكیل ، دریا قورویوب ؛ یعنی چورگین یاریسینی ، دولمانین چوخونی یه ییبلر ، سودو ده تمام ایچیبلر . قیز آتاسینا چوخ یالواردی كه ، او درویشلری هیچ اولماسا بیر گونلوكه ائویمیزه قوناق گتیر . كیشی  چار – ناچار  گئدیب درویشلری ائوینه گتیردی . كیشی نین قیزی نین گوزی بالاجا چپ ایدی اودور كه ، ائو شئیلرینی دوزنده بیر آز اكری قویموشدی . درویشلر ایچری گیرن كیمی ائوه دقتلی باخدیلار خوش گلدیندن سوراائو صاحبی دئدی : درویش قارداشلار ائویمیز نئجه دیر ؟ خوشونوزا گلیرمی ؟ درویش قیزین گوزونون چپ لیكینه اشاره وورماق اوچون دئدی : ائوینیز چوخ قشنگدیر ، اما بیرجه عیبی وار . باجاسی بیر بالاجا اگلیدیر . تئز قیز جواب وئردی كه باجانین اگری اولماغینا باخما ، توستی دوز چیخیر . درویشلر بیر آز اوتوراندان سونرا قیز اونلاردان خبر آلدی كه ، اوره كی نیز نه ایسته ییرسه یئمكه حاضرلاییم . شاه گوردی كه كیشی نین حیطینده بیر آت ، خیلی تویوقلاری وار ، اودور كه ، دئدی: بیر ائله شئ گئتیر كه ایچینی ئوزوموز یه یك ، اورتا – سینی تویوقلارینیز ، قیراغی نی دا آتینیز . قیز او ساعت گتیریب اورتالیغا بیر یئمیش قویوب دئدی : ایچینی ئوزونوز یه یین ، توملارینی تویوقلارا وئرین ، قابیغی نی دا آتیمیز یه یر . پادشاه قیزین عقلینه تعجب ائله ییب دئدی ، آفرین دئدی . شاهلا وزیر قیزدان چوخ راضی لیق ائله ییب قایتدیلار . یولدا قاباقلارینا بیر پینه چی چیخدی . شاه ائشیتمیشدی كه بو پینه چی ده چوخ عقیللی كیشیدیر اودور كه اونون یانینا چاتاندا شاه الینی باشینا قویدی پینه چی جواب اولاراق الینی دیلینه ووردی. سونرا شاه دئدی: ینه چی قارداش دوققوزی اوچه وورا بیلیب سنمی ؟ پینه چی دئدی : ووردوم توتمادی  هم ده ایكی لر قویمادی شاه دئدی : اوزاقداسان یوخوندا ؟ پینه چی دئدی : اوزاغی یاخین ائله میشم. شاه ینه سوروشدی كه ایكیده سن اوچده ؟ پینه چی جواب وئردی كه : ایكی نی اوچ ائله میشم. شاه آخردا دئدی : قاز گوندرسم یولا بیلرسنمی ؟ پینه چی دئدی : ائله یولارام . شاهلا وزیر پینه چیدن آیریلیب گلدیلر. شاه پالتارینی دگیشیب تخته چیخاندان سونرا دئدی : وزیر سنین اوچون عیب دیر كه ، پینه چی نین یولدا دانیشدیغی سوزلرین معناسینی بیلمیه سن . اودور كه گئت اویرن . اما مبادا كیشی نی اینجیده سن . وزیر چوخلی پولدان قیزیلدان گوتوروب آتینی مینیب قاییتدی پینه چی نین یانینا . كیشی نی تاپیب دئدی : شاهلا دانیشدیغین سوزلرین معناسینی منه دئیه رسنمی ؟ پینه چی دئدی : سوزون هره سینه بیر قیزیل وئرسن دئیه رم. وضیر راضی لاشدی . پینه چی دئدی : شاه الینی باشینا قویماقدا سوروشوردی كه ، باشین سلامت اولماق اوچون نه ائتمك لازمدیر .من الیمی دیلیمه ووردوم كه دیلینی ساكت قویسان ، باشین سلامت اولار . سونرا او دئدی : دوققوز اوچه ووردونمی . یعنی یازی ، یایی ، پائیزی – دوققوز آیی ایشله ییب اوچ آی قیشیدا دولانماق اوچون روزی توپالایا بیلیبسنمی ؟ دئدیم : ایشله دیم بیر شی چیخمادی . هم ده اوتوز ایكی دیشیمدن آرتمادی . سونرا شاه دئدی : اوزاقداسان ، یاخیندا ؟ اوزاغی گورورسن یوخسا یاخینی ؟ من جواب وئردیم كه ، یاخینی گورورم .ایكیده سن اوچده .  یعنی آیاقلارین سوزونه باخیرمی . دئدیم كه ایكی نی اوچ ائله میشم. یعنی ایكی آیاغیملا یریمه گه چتین لیك چكیرم . الیمه آغاج دا آلمیشام . آخردا شاه دئدی : قاز گوندرسم یولارسانمی ؟ دئدیم كه یولارام . او قاز دا سن ایدین . پوللارینی الیندن آلدیم . وزیر پینه چی یه چوخلی قیزیل وئردیگیندن پشیمان اولدی . آتی سوروب گئتمك ایسته ینده فكر لشدی كه ، قوی منده اونا سئوال سوروشوم ، جواب وئره بیلمسه ، دببه له ییم پوللاریمی آلیم . وزیر دئدی : آ كیشی ایندی سن ده دی گوروم بو ساعت پادشاه نه ائله ییر ؟ پینه چی بیر آلتدان یوخاری باخیب دئدی : سن بیلیرسن كه ، پادشاه بویوك آدامدی ، پادشاه حققینده دانیشاندا گرك بیر آز حرمتلی اولاق . ایندی من اوتورموشام قورو یرده ، قاباقیمدا دا جیریق – جیندیر آیاق قابی لار ( باشماقلار ) . بوردان شاهین حققینده دانیشماق اولار ؟ گل سن آتی وئر منه ، او زرلی عبانی دا سال چیگنیمه ، قامچینی ده وئر الیمه سونرا دئییم . وزیر راضی اولدی . آتدان دوشدی . او ساعت پینه چی سیچراییب میندی آتا ، وزیرین زرلی عباسین چیگنینه سالیب دئدی  : وزیر بیل اگاه اول ، بو ساعت پادشاه سنین كیمی آتلی لاری ائله ییر پیاده ، منیم كیمی پیاده لری ائله ییر آتلی . دی خداحافظ !! پینه چی آتا بیر قامچی ووروب گوزدن ایتدی . وزیر ها گوزله دی پینه چی گلیب چیخمادی . آخردا سویو سوزله – سوزله گلدی پادشاهین یانینا . پادشاه دئدی : وزیر گورورسنمی دنیادا نئجه آداملار وار ؟ ایندی دی گوروم ، وزیرلیكه او لاییقدیر ، یوخسا سن ؟ وزیر پینه چینین اوندان عقیللی اولدوغونی بوینونا آلدی . شاه پینه چی نی تاپیب اونو وزیر تعیین ائله دی .

گویدن اوچ آلما دوشدی . بیری منیم ، بیری سنین ، بیری ده ناغیلا قولاق آسانلارین .